Tom Enders, nomenat president d’EADS lo 1r de junh passat, reafirmèt que desirava que la sedença del grop aeronautic foguèsse installada a Tolosa.

“Pensi que Tolosa es un bon endrech per la sedença del grop, simplament perque es lo mai grand sit d’EADS, non solament d’Airbus, tanben amb los nòstres emplegats dins l’espacial”, çò diguèt Tom Enders a Murèth al moment d’una ceremònia organizada per la Fondacion Airbus. Ja quand èra PDG d’Airbus, Tom Enders aviá fach saber qu’installar lo sèti d’EADS a Tolosa “auriá de sens”. D’efièch, a l’ora d’ara, l’ostal maire d’Airbus a lo sieu sèti a l’encòp a París e a Munic en rason de l’equilibri francoalemand. Mas per Tom Enders, “una societat normala, es un sèti, pas dos o tres”.
 
E mai s’agropar tot a Tolosa “es sens cap de dobte l’objectiu, i arribarem pas d’un solet còp” diguèt Enders a La Dépêche du Midi dimècres passat.