De scientifics descobriguèron un exemplar feme d’una espècia de pofre qu’abita a mai de 1500 mètres jol nivèl de la mar, que passèt quatre ans e mièg a coar sos uòus en los protegir fins que los petits pofres nasquèsson; e en renonciant quitament a s’alimentar. Se tracta del periòde d’incubacion mai long que se coneis dins la natura, segon çò que publiquèt la revista scientifica Plos One a la fin de julhet passat.
 
Los scientifics empleguèron un sosmarin contrarotlat a distància per seguir l’espècia Graneledone boreopacifica, près de la còsta californiana. Seguiguèron una femèla que protegissiá aperaquí 160 uòus sul fons marin a qualques 1500 metres de prigondor. La causiguèron perque aviá fòrça marcas sul còrs qu’ajudavan a l’identificacion de l’exemplar. Los cercaires contrarotlèron aquel pofre feme en 18 immersions pendent 53 meses, entre 2007 e 2011, quand los petits nasquèron. Pendent aquelas quatre annadas e mièja, l’animal abandonèt pas los uòus en cap de moment, e lo vegèron pas jamai se noirir. De fach la maire veniá de mai en mai magra e esblancossida. Demorèron espantats de descobrir aquel instint mairal tan poderós. “Es extraordinari. Es incresable. Sèm encara estonats de çò que vegèrem”, çò diguèt Bruce Robinson, un scientific de l’Institut de Recèrca de l’Aqüari de la Baia de Monterrey.
 
La majoritat dels pofres pondon d’uòus solament un còp dins lor vida e morisson pauc de temps après l’espelida dels pichons. Mas los novèls nats son ja capables de caçar après una incubacion tan longa.