Aviam ja vist de fotografias extraordinàrias coma lo Canigó dempuèi Marselha. E ara una còla d’afogats de fotografia a capitat una causa que s’èra pas jamai facha: fotografiar lo perfil del Pic de Chabriera (Ambrunés) e del Pueg de la Secha (Ubaia), dels Alps occitans, retalhats sul disc solar a l’alba dempuèi los Pirenèus. Concretament, dempuèi la cresta del Canigó (Catalonha). Las fotografias, e l’explicacion de coma las an fachas, se son publicadas sul blòg de Marc Bret.
 
A la mitat de julhet passat, Juanjo Díaz de Argan faguèt aquela sequéncia fotografica, dempuèi la cresta del Canigó, amb un telescòpi aplicat sus sa camèra. Lo resultat es extraordinari, amb lo perfil de qualques montanhas situadas a 381 quilomètres de distància e eclipsant parcialament lo Solelh, que, a prepaus, se pòt distinguir en taca solara dins la partida superiora drecha del disc.


 
Jordi Solé Joval ne faguèt tanben aquesta fotografia.
 

 

E Marc Bret publiquèt aquesta illustracion qu’indica las montanhas dels Alps occitans que captèron en las fotografias.
 

 

Un probable recòrd mondial
 
Bret explica que “probable son d’imatges de recòrd mondial dins la fotografia de distància extrèma”. De fach, segon Viewfinder Panoramas, l’objècte fotografiat a una distància mai granda que se n’aja coneissença èra fins ara la cresta del Mont Denali (o Mont McKinley), en Alaska; un alpinista lo fotografièt dempuèi una distància de 366 quilomètres.
 
Los autors de las fotografias dels Alps ofrisson aquela mapa, ont se pòt remarcar la distància enòrma: