La chifra d’afars de Coca-Cola als Estats Units a davalat d’1,37% e la de McDonald’s a baissat d’1,5%, segon d’informacions de Vegactu, que rapòrta tanben çò meteis en Euròpa: mens 2% per Coca-Cola e mens 1% per McDonald’s.
 
Lo sit analisa divèrsas ipotèsis d’aquela davalada segon d’informacions extrachas de mèdias coma Fourchette et Bikini, 24 Matins e Le Point.
 
Una de las explicacions d’aquela davalada seriá los darrièrs escandals alimentaris qu’an fach paur als consumaires. Dins aquel sens, Vegactu cita Nik Modi, analista en cò d’RBC Capital Markets, e Paul Ausick, del sit d’analisis 24/7wallst.com, que segon eles las vendas de Coca-Cola, d’Sprite, dels nuggets e dels cheeseburgers començan a demenir dempuèi que s’es publicat d’estudis scientifics qu’assòcian lo consume excessiu d’aqueles aliments amb l’obesitat e la diabèta.
 
Ça que la, cal tanben prene en compte qu’aquelas marcas aurián pogut demenir los afars fàcia a la concurréncia, e sustot als prèses basses de KFC e Burger King.
 
Per compensar lors pèrdas, Coca-Cola e McDonald’s son a far montar las vendas dins los païses diches emergents, mai que mai en America del Sud e Asia. Dins aquel sens Coca-Cola investirà en Mexic 8,3 miliards de dolars d’aicí a 2020, del temps qu’Asia es ja lo tresen mercat mai important de McDonald’s, ont aquela societat es ja implicada dins un escandalàs sanitari a Shanghai: l’usina del grop estatsunidenc OSI Group, provesidor de McDonald’s, l’an barrada perque a vendut de carn perimida.