Un dels centres de planificacion familiala de Marselha a barrat pendent doas setmanas per lo primièr còp en cinquanta ans. Los salariats an degut prene de vacanças forçadas pendent un periòde que las femnas marselhesas i se poiràn pas informar sus la contracepcion, la sexualtiat en general e l’avortament. L’associacion que regís lo centre assegura que las caissas son voidas e que l’avenir de l’associacion es quitament menaçat.
 
“Aquesta barradura es per marcar lo còp”, çò precisa a Libération Gilles Le Beuze, president del centre de planificacion familiala. “Se projècta de licenciaments en fin d’annada, e mai s’anam tot faire per evitar aquò”, çò apondèt. E mai se Le Beuze reconeis qu’aquesta crisi es lo resultat d’una gestion marrida, las subvencions an baissat. De fach, la contribucion del conselh general de las Bocas de Ròse es passada de 283 000 èuros en 2013 a 192 000 en 2014.
 
Pendent la barradura dels locals, Chloé, una conselhièra del centre de Marselha, gerís las telefonadas e rèsta coma lo sol ligam de l’associacion dins tot lo departament de las Bocas de Ròse. Ditz qu’es aclapada d’òbra —“en cinc minutas m’an sonat uech còps”, çò explica— e tanben que mantas joventas “comprenon pas perqué es barrat”.
 
 
____
Mai d’informacions: Libération. À Marseille, les vacances forcées du planning familial