Es encara un drama de la violéncia estradièra. Un automobilista ebri tuèt dijòus passat doas joventas de 17 e 19 ans sus un escotèr, près de Montpelhièr. L’òme aviá 1 grama d’alcòl per litre de sang al moment de son arrestacion.
 
Se passèt a Latas, sus l’estrada D986, a qualques quilomètres de Montpelhièr, vers 2h15 del matin. Las doas victimas èran encara en vida al moment que los pompièrs las evacuèron. Foguèron percutidas per darrièr, per la veitura que perdèt son parachòcs e sa placa d’immatriculacion. “A priòri foguèron tirassadas sus mai d’un centenat de mètres”, çò declarèt a l’AFP lo ministèri public.
 
Un òme de 24 ans es lo suspècte de l’accident mortal, que lo detenguèron ebri. Donèt d’indicacions als policièrs en permetent de trobar la veitura accidentada, que veniá el de la comprar. Segon la placa d’immatriculacion, la veitura èra encara en nom de l’ancian proprietari.