L’armada dels Estats Units faguèt divendres las primièras atacas aerianas contra las milícias de l’Estat Islamic al sud de Curdistan. Lo president Barack Obama aviá anonciat de matin qu’autorizava las atacas selectivas amb la tòca de frenar las milícias sunnitas e d’empedir un genocidi de las minoritats nacionalas, etnicas e religiosas perseguidas pels jihadistas de l’Estat Islamic (ancianament ÈIIS, Estat Islamic en Iraq e Siria).
 
Los atacs se menan a tèrme amb dos avions F18 que lançan de bombas guidadas per lasèr, e amb d’artilhariá mobila près d’Arbil. Aital vesèm lo retorn de l’armada estatsunidenca en Iraq, d’ont se retirèron definitivament en 2011 après destabilizar la region amb de guèrras dempuèi 1990 e l’invasion del país en 2003. Ça que la, lo govèrn estatsunidenc ditz que i tornarà pas mandar de tropas de combat.
 
Los bombardaments estatsunidencs cèrcan d’aturar l’avançada dels milicians sunnitas cap a la capitala del Curdistan iraquian, Arbil, per protegir lo personal estatsunidenc de la vila e per evitar un genocici de la minoritat religiosa dels iaziditas. Lo govèrn estatsunidenc diguèt qu’aqueles atacs selectius los a decidit après qualques setmanas en amassar d’informacions; e que las menarà fins a arrestar l’avançada de las milícias sunnitas cap al Curdistan meridional.
 
En escasença d’aqueles atacs, los Estats Units an enebit a las aerolinhas estatsunidencas de subrevolar Iraq.