Una familha de Lorena que fasiá sas vacanças als Pirenèus de Catalonha explica que rescontrèron cap e cap un lop al massís de Puigmal, ont èran anats far una excursion. Segon çò qu’an dich los protagonistas a France Bleu, l’animal fugiguèt quand sentiguèt la preséncia del grop, mas capitèron de ne far una fòto. Lo paire de la familha, Jean-Charles Grange, a qualificat lo rescontre d’“excepcional” e a afirmat qu’aquel moment “restarà totjorn enregistrat dins la nòstra memòria”. Se passèt lo 24 de julhet passat mas la familha o a pas volgut contar fins ara, per levar pas la panica demest los excursionistas.
 
La familha se trobava en Nauta Cerdanha e decidiguèron de far una excursion al massís de Puigmal. Jean-Charles Grange, que son mestièr es entomològ, èra sortit amb la siá femna e los sieus dos enfants per caçar d’insèctes de ser, e al retorn rescontrèron subitament l’animal. “Vegèrem una causa que bolegava fòrça lèu a un vintenat de mètres”, çò explica Grange, “e sul pic lo vegèrem plan, e me metèri a cridar: «Es un lop! Es un lop!»” Puèi l’animal fugiguèt en corrent.
 
La familha aguèt pas paur pr’amor que l’animal mostrèt pas cap d’actitud menaçanta en veire lo grop, mas que s’amaguèt demièg qualques pins e d’ailà los observava. Foguèt en aquel moment que la femna capitèt de far una fotografia ont se distinguís clarament la figura del lop.
 
Fa dètz ans que se reconeguèt oficialament que lo lop èra tornat en Catalonha, malgrat que qualques exemplars èran ja estats detectats abans per qualques personas. Es un animal de mal veire e de mal fotografiar. 

 



Segon d'informacions d'Est Republicain, la fòto seriá tirada d'Internet, e aquel rescontre amb lo lop seriá fals.