La comuna de Narbona es a menar de politicas amb consciéncia de país, segon çò que ven de publicar País Nòstre sus son blòg. Amb un cònsol independent, Didier Mouly, e un elegit de País Nòstre-Bastir, la nòva còla municipala a un bilanç plan positiu e espantant d’occitanitat.
 
 
Afirmacion occitanista al rugbi
 
Per mostrar son engatjament occitanista, la nòva còla municipala, just après son eleccion, causiguèt la partida de rugbi professional D2 entre lo Racing Club Narbonés e l’AÈBE Besièrs, que se debanèt dimenge 4 de mai a l’Estadi Egassiaral de Narbona. D’estands de las associacions aculhiguèron los suportaires, s’encoratgèt a portar de bandièras occitanas e se distribuiguèt a totes los espectators lo tèxt de l’imne nacional occitan Se canta, que foguèt interpretat abans la partida pels cantaires Jo Sales e Joanda.
 
 
Creacion de l’Ostal Occitan
 
Al mes de junh an creat l’Ostal Occitan per aculhir las associacions que compausan Convergéncia Narbonesa. Se tracta d’associacions que trabalhan dins los encastres de la cultura, l’ensenhament, lo ciutadanatge, la comunicacion e l’espòrt e que comptan amb la complicitat de Jean-Marie Orrit, elegit encargat de l’occitan de la municipalitat de Nabona. Aquel d’aquí que lor a mostrat “una vertadièra volontat politica en favor de l’occitan”.
 
 
Una nòva escòla Calandreta
 
Aqueste estiu la municipalitat de Narbona ven d’anonciar la creacion d’una autra escòla Calandreta pel mes de setembre que ven, amb un investiment comunal d’80 000 èuros.