Lo prèire espanhòl infectat per Ebòla, Miguel Pajares, moriguèt ièr dimars. Lo 6 d’agost foguèt menat a Madrid dempuèi Libèria per èsser tractat dins un espital de la capitala espanhòla. Mas Pajares respondèt pas  positivament al tractament experimental d’un medicament nomenat Zmapp, qu’es lo meteis que s’aplica a dos malauts d’Ebòla als Estats Units.
 
Qualques jorns abans èran mòrts a Monròvia, la capitala de Libèria, los dos companhs de Pajares, George Combey e Chantal Pascaline, tanben infectats, e que las autoritats espanhòlas acceptèron pas de los menar a l’estat espanhòl. Dins las darrièras setmanas, la nòva flambada d’Ebòla a tuat mai d’un milièr de personas, mai que mai en Sierra Leone, en la Republica de Guinèa e en Libèria.
 
 
D’epidèmias mai inquietantas que l’Ebòla
 
E mai se l’Ebòla a levat la panica, se cal avisar qu’en Africa es pas la causa de mortalitat mai inquietanta. Coma o remembra ben lo jornalista Xavier Aldekoa, la malària, lo sida e sustot la famina tuan fòrça mai de personas dins lo continent empaurit.