Es una tradicion plan establida: cada an pel 15 d’agost se debana a Còrdas d’Albigés (País d’Albi) la Fèsta Occitana. Es organizada per l’associacion La Talvera amb la participacion del municipi. De notar que l’associacion, que fa pas qu’un amb lo famós grop musical eponim, es estatjanta del vilatge. Es atanben la costuma de convidar cada an per aquesta fèsta una comarca occitana diferenta. L’an passat èra lo Bas Lengadòc, ongan es Cevenas.
 
Tre lo matin a dètz oras, e aquò fins a sèt oras del vèspre, se debana jol mercat cobèrt la fièra del libre e del disc occitan. Divèrses autors seràn presents: Jòrdi Blanc, Sèrgi Gairal, Sèrgi Viaule, Danièl Loddo entre maites… La fièra del libre e del disc occitan serà animada pels animators de Ràdio Albigés. S’i debanaràn de lecturas publicas, d’entrevistas d’autors e de signaturas d’obratges.
 
Mentretant, entre onze oras e miègjorn un passacarrièra musical amb los grops musicals Tornarmai e La Talvera partirà del bas de la ciutat e escalarà fins la Plaça del Mercat Cobèrt. Tota la vesprada se debanaràn de jòcs tradicionals e, demest aquestes, una espròva de lançaberret que comptarà pel campionat mondial. Se poirà tanben far al quilhon.
 
Sus la Plaça de la Brida se tendrà, pels mainatges, un talhièr de fabricacion d’instruments de musica. En fin de vesprada cadun aurà lo seu. D’aquel temps, de cap en cima de la ciutat medievala, Danièl Loddo condiva lo monde a una passajada musicala e contada dins los recantons de la vila. Una animacion tras qu’originala que deuriá encantar lo public que lo voldrà plan seguir dins sas peregrinacions improbablas.
 
En fin de vesprada, cap a sèt oras, sempre jol mercat cobèrt, un talhièr de dança serà prepausat al public. La fèsta s’acabarà, a partir de nòu oras, per una balòcha giganta amb las orquèstras Tornarmai e La Talvera.
 
Coma se ditz en Albigés: “Camina que caminaràs, a Còrdas tornaràs!”
 
 
 
 
Sèrgi Viaule