En traversant l’Estrech de Gibartar
 
L’estat espanhòl ven de viure l’intrada mai massissa d’immigrants. Dimars e dimècres passat, mai de mila personas provenent de l’Africa Subsahariana ensagèron d’i intrar, en sautant la tripla barrièra frontalièra de Melilla o ben en traversant l’Estrech de Gibartar dins d’embarcacions de joguet. Dimars se salvèt 835 personas dont 92 èran dins d’embarcacions davant las còstas d’Andalosia.
 
Fòrça dels immigrants arribèron a Tarifa aganits e foguèron recebuts per de volontaris de la Crotz Roja qu’avián adaptat un terren esportiu coma centre d’aculhença, perque lo sol centre que i a es desbordat.
 
Las autoritats son en alèrta qu’espèran l’arribada de mai d’embarcacions.
 
 
En sautant la barrièra de Melilla
 
Mantes immigrants an ensajat fòrça còps de sautar la tripla barrièra de la frontièra per Melilla. Aperaquí 750 personas an ensajat de sautar en tres ocasions al començament d’aquesta setmana e, encara ièr, qualques centenats tornèron ensajar per un autre ponch, mentre qu’80 personas aperaquí demorèron qualques oras enfiladas sus la barrièra en esperant una bona escasença.
 
Los immigrants s’aprochavan de la barrièra en cridant “bosa, bosa”, que segon eles vòl dire “victòria” o “reüssida”.
 
Qualques unes an capitat a sautar en arribant al Centre de Sejorn Temporari dels Immigrants (CETI segon sa sigla en espanhòl). Segon çò qu’an dich, vendrián de Mali e Cameron.
 
 
Long de las còstas d’Itàlia
 
Tocant las còstas d’Itàlia, ongan an ja salvadas aperaquí 80 000 personas, çò qu’es un aument del 500% a respècte de l’an passat. Se tracta majoritàriament de sirians e d’eritrèus que fugisson las orrors.