Mentre que los païses independents jògan l’Èuro 2012 en Polonha e en Ucraïna, i a qualques nacions sens Estat que fan quicòm mai que de l’agachar a la television. Es lo cas d’Occitània, qu'a mandat la siá seleccion de fotbòl en Alemanha per jogar l’Europeada 2012, un torneg que se fa cada quatre ans e qu’amassa los territòris lingüistics europèus. En total, 20 esquipas lucharàn per conquistar un títol que la darrièra edicion foguèt ganhada per Sud Tiròl. Las partidas se debanaràn a tèrme dins la region soraba de Budyšin (Bautzen en alemand) entre lo 16 e lo 24 de junh.

En la darrièra edicion de l’Europeada, que se joguèt en 2008, la seleccion nacionala d’Occitània arribèt en quatrens de finala. Ongan, Occitània fa partida d’un grop qu’aurà de far concurréncia amb la minoritat danesa d’Alemanha, amb los cimbres d’Itàlia e amb lo País de Galas. L’esquipa de la crotz e l’estela deurà demorar en primièra posicion per passar a la seguenta eliminatòria.
 
Coma en d’autras escasenças, los occitans seràn dirigits pel seleccionaire e entraïnaire Deidièr Amiel, que comptarà ongan amb un vinenat de jogaires de totes los parçans d’Occitània, e mai se la majoritat venon de Lengadòc e de Gasconha.

La seleccion occitana arriba en Alemanha après jogar la Viva World Cup en Curdistan, ont a conquistat una plan digna cinquena posicion sus nòu esquipas en competicion. En total, los occitans joguèron quatre partidas, ne ganhèron tres e ne perdèron solament una.