França a anonciat que mandarà d’armas al Curdistan iraquian per lo sosténer dins la lucha contra los jihadistas de l’Estat Islamic. “Per satisfar los besonhs urgents exprimits per las autoritats regionalas de Curdistan, lo cap de l’estat a decidit, en acòrdi amb Bagdad, d’i mandar d’armas”, çò an dich de fonts de l’Elisi. Amb aquela decision, l’estat francés sosten per lo primièr còp lo govèrn d’un país sens estat.
 
Lo govèrn francés defend que la “situacion catastrofica” que viu la populacion curda en Iraq “requerís la mobilizacion internacionala”. Per aquò, vòl exercir un ròtle actiu en la prestacion de tota l’assisténcia que siá necita a las nòvas autoritats iraquianas, dirigidas pel primièr ministre Haidar Al Abadi, nomenat fa qualques jorns. Ça que la, a pas especificat lo tipe d’armas ni la quantitat que i mandarà.
 
La decision se prenguèt après la reünion entre lo president francés, François Hollande, e lo president del Curdistan iraquian, Massud Barzani, la setmana passada. E respond tanben a las demandas del govèrn iraquian, que ja porgís d’armas als combatents curds, los peshmèrgas.
 
Mentretant, los Estats Units contunhan de bombardar los jihadistas sus las montanhas de Sinjar, ont i a entre 20 000 e 30 000 personas refugiadas sens aiga, ni manjar, ni refugi, segon çò qu’a explicat l’ÒNU.