La màger part del mèdias del país parlavan ièr de l’estancada de l’economia francesa. Mas lo cas alemand es quitament mai inquietant pr’amor qu’es a recular. Es un marrit presagi per la recuperacion de l’economia europèa. Lo produch interior brut (PIB) alemand a davalat d’un 0,2% segon las donadas del Burèu Federal d’Estatistica.
 
Segon los expèrts, la crisi en Ucraïna poiriá èsser una de las causas. Mas tanben cal soslinhar qu’en Alemanha las exportacions an crescut mens que las importacions. Maitot cal veire una reculada fòrta dins los investiments, mai que mai en la construccion.
 
L’economia francesa es estancada, e capita pas a se levar. Segon las donadas provisòrias, clavarà lo segond trimèstre de l’annada amb la creissença nulla. De fach, l’estat francés a aumentat la despensa publica mas a demenit los investiments dins las entrepresas. En mai d’aquò, lo comèrci exterior es en deficit.
 
Davant tot aquò, lo ministre de las finanças, Michel Sapin, a demandat a la Comission Europèa de reorientar sas politicas e a avertit la Banca Centrala Europèa que França complirà pas objectiu de creissença fixat a l’1% per 2014.
 
Per contra, l’estat francés arribarà dusca a la fin amb lo dich “plan de responsabilitat” del primièr ministre Manuel Valls, per estalviar 50 miliards d’èuros en tres annadas.
 
 
 
___
— Le Monde: Pourquoi l’économie française stagne
— Le Figaro: Une nouvelle fois, la croissance n’est pas au rendez-vous
— Die Welt: Deutsche Wirtschaft schrumpft überraschend deutlich