La demografia del continent african contunharà d’èsser d’actualitat dins los decennis venents. La populacion es a aumentar e se calcula qu’en 2050, lo 40% dels enfants del Mond naisseràn en Africa.
 
La creissença exponenciala de la populacion africana e la rapida urbanizacion del territòri son ja conegudas, mas, segon un estudi de l’UNICÈF, Africa viurà un grand cambiament demografic a una velocitat que s’es pas encara jamai vista. Lo rapòrt, entitolat Generation 2030 Africa, explica que la nauta fertilitat e lo nombre creissent de femnas en edat de se reproduire faràn nàisser près de dos miliards de nenons africans dins los trenta cinc ans que venon.
 
Segon aquel rapòrt, e mai se la mortalitat infantila contunharà d’èsser nauta, la populacion de mens de dètz e uèch ans arribarà gaireben a un miliard en 2050.
 
Vaquí qualques donadas del rapòrt:
 
— La populacion africana de mens de dètz e uèch ans creisserà dels dos tèrces, fins a un miliard, de 2015 fins en 2050. L’UNICÈF prevei qu’Africa serà l’abitança de gaireben la mitat dels enfants del Mond.
 

  
 
— La subrevivença infantila s’es melhorada en Africa, mas las mòrts infantilas se concentraràn de mai en mai en aquel continent.
 
 
 

— Lo nombre absolut de populacion infantila creisserà, mas son percentatge a respècte del total de la populacion del continent davalarà fins a gaireben un 40% en 2050.
 

 
 
— La populacion africana doblarà de 2015 a 2050.
 

 
 
 
L’agéncia de l’ÒNU explica que “la prevision demografica ofrís als legislators una oportunitat unica de crear una estrategia centrada sus l’investiment dins l’enfança, tocant la santat, l’educacion e la proteccion”. E apond qu’Africa deuriá remarcar que dins las autras regions del Mond qu’an agut de cambiaments semblables, an agut de beneficis economics.