Lo 16 d’agost de 2012, lo govèrn de l’Eqüator anoncièt que concedissiá l’asil diplomatic a Julian Assange, fondador de Wikileaks. Una anóncia que generèt la tension entre lo govèrn eqüatorian e lo britanic, que dempuèi a plaçat de policièrs a l’entorn de l’ambaissada amb l’òrdre d’arrestar Assange sul pic tre que metrà un pè en defòra de la bastissa.
 
L’an 2010, Suècia pausèt dos mandats d’arrèst contra Assange per de delictes supausats de secutament sexual e viòl, e sollicitèt l’intervencion d’Interpòl. Assange, qu’aviá desaparegut, se liurèt fin finala a la polícia metropolitana de Londres lo 7 de decembre, e una setmana puèi sortiguèt de la preson e passèt en detencion a domicili. Lo 19 de julhet de 2012, violèt la libertat condicionala e se refugièt dins l’ambaissada de l’Eqüator, ont demandèt l’asil politic.
 
Assange a totjorn negat las acusacions de viòl e secutament e responsabiliza los Estats Units de bastir una conspiracion contra el coma responsa per aver fach publics de milièrs de documents secrets estatsunidencs.
 
Se son passadas doas annadas dempuèi que l’Eqüator concediguèt l’asil a Assange. Suècia a negat recentament qu’aja cap d’intencion de suspendre sa demanda d’extradicion e lo govèrn d’Eqüator a declarat qu’Assange pòt demorar indefinidament dins son ambaissada. Coma o remembrava alavetz lo jornalista de la BBC Dominic Casciani, lo periòde mai long d’asil similar conegut “es lo del cardinal Jozesf Mindszenty, que demorèt quinze ans dins l’ambaissada dels Estats Units a Budapèst après l’invasion sovietica de 1956 en Ongria”.
 
Mentretant, lo cònsol de Londres, Boris Johnson, a qualificat l’asil d’Assange de “degalh ridicul”, pel còst dels policièrs destinats a susvelhar la bastissa a tota ora. E mai se viu embarrat dins l’ambaissada, Assange es aparegut pro sovent als mèdias amb d’entrevistas e a recebut de vesitas de tota sòrta, coma la recenta d’Eric Cantona.
 
 
De filmes sus Assange e Wikileaks
 
E de sa vida, restacada a Wikileaks, se son ja faches divèrses filmes. Demièg los mai recents i a The Fifth State, protagonizat per Benedict Cumberbatch e Daniel Brühl. Lo filme, criticat per Assange e pel quite portal de filtracions, a pas agut lo succès que s’esperava.
 
Un autre filme, en format documentari, es We Steal Secrets: The Story Of Wikileaks, que conta l’istòria de Wikileaks dempuèi las primièras filtracions fins a l’esclatament de l’afar Manning, amb de declaracions de jornalistas, de companhs d’Assange, de responsables de seguretat del govèrn estatsunidenc, del delator del soldat Bradley Manning e d’una de las femnas que denoncièt Assange, demest d’autres. Vaquí lo filme entièr: