L’Organizacion Mondiala de la Santat (OMS) a alertat que la chifra de cases e de mòrts per la darrièra flambada del grelh d’Ebòla en Africa Occidentala es estada sosestimada per la comunautat internacionala. Es per aquò qu’a sollicitat que s’apliquen de mesuras extraordinàrias per aturar lo virus, qu’afècta quatre estats (Guinèa, Libèria, Nigèria e Sierra Leone) e qu’a ja tuat mai de mila personas e n’a infectadas doas mila de mai.
 
Segon l’OMS, lo personal desplegat dins los païses afectats considèra que, malgrat los cases d’infeccions e de mòrts, se sosestima la magnitud de la flambada.
 
L’autoritat sanitària decretèt la setmana passada la flambada d’Ebòla coma una emergéncia internacionala e demandèt d’intensificar a l’extrèm las mesuras de proteccion dins los estats afectats.
 
D’un autre costat, l’OMS remembra que lo risc de transmission de la malautiá per transpòrt aerian es fòrça bas e, per aquò, non recomanda pas cap d’enebicion de viatjar.
 
 
D’epidemias mai inquietantas que l’Ebòla
 
E mai se l’Ebòla a levat la panica, se cal avisar qu’en Africa es pas la causa de mortalitat mai inquietanta. Coma o remembra ben lo jornalista Xavier Aldekoa, la malària, lo sida e sustot la famina tuan fòrça mai de personas dins lo continent empaurit.