Doas de las sòcias del grop de punk rus Pussy Riot apareisseràn dins un dels nòus capítols d’House of Cards, la sèria politica estatsunidenca protagonizada per Kevin Spacey e Robin Wright. Netflix es a mand de lançar la tresena sason e, dins un dels nòus capítols, s’i poirà veire Mariia Aliokhina e Nadezhda Tolokonnikova, que son anadas als Estats Units. Malgrat que Netflix o aja pas encara confirmat, segon City Paper e Le Monde, las doas activistas an participat a l’enregistrament d’un capítol de la nòva sason d’House of Cards.
 
De fach, elas doas avián ja manifestat lor interès per House of Cards e s’èran reünidas amb de membres de la còla. “Per nosautras es important de conéisser de gents que fan de cinèma politic als Estats Units, perque en Russia n’i a pas e volèm saber cossí se fa. Volèm aprene de far un filme politic”, çò declarèron fa gaire dins una entrevista al Wall Street Journal.
 
Aliokhina e Tolokonnikova foguèron empresonadas pendent dos ans, acusadas de “vandalisme per òdi religiós” en seguida d’una accion dins una catedrala de Moscòu. Las mandèron a de camps de presonièrs plan luènh de Moscòu, e fin finala, en decembre passat, sortiguèron en libertat, graciadas per una amenistia massissa que la decretèt Vladimir Putin.
 
 
Tresena sason d’House of Cards
 
Vaquí dos dels vidèos promocionals de la tresena sason d’House of Cards: