Las tropas curdas del nòrd d’Iraq an començat una contraofensiva per recuperar lo contraròtle de divèrsas vilas que son ara en mans de l’Estat Islamic, mai que mai la capitala del Curdistan meridional, Mossol. Segon las informacions qu’an publicadas los mèdias internacionals, los curds an capitat a far recular los jihadistas en qualques territòris amb lo sosten dels bombardaments de l’aviacion estatsunidenca.
 
Lo general curd Abd Ar Rahman Kurini assegurèt dimenge passat que i auriá un progrès significatiu dins las oras venentas e que recuperarián lo contraròtle de la restanca de Mossol. Aquela restanca se tròba a un vintenat de quilomètres de la vila curda de Dahuk e es una de las resèrvas d’aiga mai importantas d’Iraq. Se compta qu’a una capacitat de qualques milions de mètres cubics.
 
La contraofensiva curda s’es iniciada just après que s’es sauput que los jihadistas de l’Estat Islamic assassinèron mai de quatre cents iaziditas en Iraq e aperaquí sèt cents membres de clans sirians.