Puèi venguèt  l’idèia de ne far un dessenh animat que foguèt produsit per la societat Cromosoma e difusit a Television de Catalonha a partir de 1994. La seria foguèt puèissa revirada en 35 lengas e coneguèt lo succès a l’estrangièr dins mai de 158 païses.

 

L’associacion roergassa AVOCA, implantada a Rodés e portaira del projècte, se lancèt donc en 2010 dins la revirada del catalan a l’occitan lengadocian de l’episòdi "Las tres bessonas e las sèt cabretas". Lo trabalh dels reviraires acabat, l’estudiò d’enregistrament "Les Hauts Plateaux" aculhiguèt, a Salas-Comtals, pròche de Rodés, una còla de comedians un bocin particulara.

 

D’efièch, l’originalitat d’aqueste projècte de doblatge en occitan ven del fach qu’una majoritat de la voses occitanas foguèron enregistradas per d’enfants bilingües sortits de Calandreta o d’Escòla Publica Bilingüa. 

 

Aital, Agathe Bodio (Anna), Malaurie Leduc (Elena) e Agnès Galibert (Teresa), ancianas escolanas de l’escòla Joan Bodon de La Primalba o de la Calandreta de Rodés, foguèron retengudas per prestar loras voses a las tres bessonas. A costat d’elas, Estela Gaffier, Jade Bodio, Mona Kounfinkana e Justine Cathala enregistrèron las voses dels cabridons. Totas aquestas dròllas descobriguèron a aquesta ocasion lo trabalh de doblatge amb las constrenchas tecnicas de l’enregistrament, las exigéncias lingüisticas e lo biais d’interpretacion que demanda. Agnès raconta: "Caliá parlar a la vitessa que los personatges parlavan dins lo dessenh animat e èra pas facile!". Estela ajustèt que "calguèt far fòrça enregistraments e calguèt repetir plen de còps e èra fòrça dur!". Çaquelà, malgrat las dificultats encontradas sul moment, ne sortiguèron totas estrambordadas e enriquidas per aquesta experiéncia unenca.
 

Del costat dels responsables del projècte, lo bilanç es mai que positiu: "Una de las envejas qu’aviam èra de far apèl a d’enfants bilingües puslèu qu’a des comedians professionals capables de far de voses infantilas. "En mai d’aquò balhèt a totas aquestas dròllas l’escasença de metre a profit d’un biais agradiu lor bilingüisme aquesit a l’escòla" declara Marie-Line Darres de l’associacion AVOCA. 

 

Cal dire que lo dessenh animat en question s’inscriu dins una vertadièra logica pedagogica de la lenga occitana amb un polit trabalh sul lexic e las expressions que pòt èsser relaiat en classa bilingüa. Cal saludar tanben lo nivèl de lenga plan polit de nòstras comedianas en èrba.

 

Dempuèi sa sortida al mes de decembre passat, mantunas centenas d’exemplars d’aqueste DVD se son ja vendudas e l’associacion AVOCA projècta la produccion d’un segond episòdi se las vendas de "Las sèt cabretas" li permeton de se tornar investir dins aquò. Lor desiram bon astre!

 

 

Lo DVD "Las tres bessonas e las sèt cabretas" (durada 30 mn) se pòt comandar alprèp de l’associacion AVOCA, place Foch 12000 Rodez, al prètz de 15€ (pòrt comprés). 





====================================================