Las susmautas a la vila de Ferguson, dins l’estat de Missorí dels Estats Units, comencèron fa mai d’una setmana e se son intensificadas. Al delà de las protèstas pacificas, dirigidas per la populacion negra de la municipalitat, i a d’afrontaments amb la polícia e de pilhatges dins las botigas. Per o combatre, lo governador de Missorí, Jay Nixon, a decidit de mobilizar la Gàrdia Nacionala. La mesura cèrca de restablir la patz e l’òrdre.
 
 
Lo detonador del conflicte
 
Las protèstas comencèron lo 9 d’agost passat, après qu’un policièr fusilhèsse Michael Brown, un jove negre de 18 ans. Las autoritats federalas e l’FBI an aviat un enquista sus l’assassinat per esclarzir çò que se passèt.
 
 
Una mòrt pas brica clara
 
Las circonstàncias de la mòrt son pas claras: la version de la polícia e la dels testimònis coïncidisson pas. D’un costat, lo policièr que lo tuèt, Darren Wilson, diguèt que lo jove l’aviá agressat e qu’aviá ensajat de li tirar dessús amb una arma de fuòc, e el agiguèt per se defendre. D’un autre costat, qualques testimònis asseguran que lo jove aviá las mans auçadas al moment dels còps de fuòc del policièr. L’autopsia, facha a la demanda de la familha, determina que recebèt sièis còps de fuòc, segon d’informacions del New York Times.
 
 
Acusat de panatòri
 
La polícia de Ferguson, dins un primièr moment, diguèt que Darren Wilson rescontrèt Brown quand enquistava sus lo panatòri d’una boita de cigarros dins un establiment de la vila. Segon los documents publicats per la polícia, Brown agressèt lo botiguièr après lo panatòri. Qualques jorns puèi, lo cap de la polícia de la vila, Thomas Jackson, desliguèt lo panatòri de l’encontre entre Brown e lo policièr que lo fusilhèt. Jackson expliquèt que l’agent arrestèt lo jove perque caminava pel mièg de la carrièra e blocava lo trafec.
 
 
De protèstas e de repression policièra
 
La mòrt de Michael Brown originèt de protèstas dins la vila de Ferguson, que sos abitants comencèron a sortir per carrièras per demandar justícia. Los vesins planhon que la mòrt del jove es un crime racial.
 
Las tensions entre la polícia e los manifestants comencèron l’11 d’agost, quand de centenats de personas s’amassèron a l’entorn del comissariat de la polícia del comtat de Sant Louis per demandar que se presentèsson de cargas d’omicidi contra l’agent que tuèt Brown.
 
Los afrontaments se son repetits cada jorn e la repression de la polícia s’es totjorn facha amb de gases lacrimogèns e de balas de goma. Segon çò qu’a dich Jay Nixon, las protèstas pacificas son estadas alteradas amb d’actes de violéncia criminala, causats per d’individús que dins qualques cases son pas d’abitants de Ferguson o quitament pas de l’estat de Missorí.
 
 
Crida a la Gàrdia Nacionala
 
Après mai d’una setmana de violéncia, Nixon a mobilizat la Gàrdia Nacionala per combatre las susmautas. Lo governador aviá ja declarat l’estat d’urgéncia dissabte de matin e aviá ordenat tanben un cobrifuòc, qu’empedís que la populacion de la municipalitat sortisca per carrièras de mièjanuèch fins a 5h. Malgrat l’òrdre, las susmautas se son pas aturadas e, diluns passat, Ferguson visquèt una de las jornadas mai violentas.