La prefectura del departament de Vauclusa a fach baissar lo salari de Joris Hébrard, cònsol FN del Pontet (Comtat Venaicin) e de sos adjonches, après que lo quite cònsol l’aja aumentat de mai del 44% lo mes passat, segon d’informacions de Le Figaro. Doncas, lo salari del cònsol es passat de 3227 èuros mensuals a 2535. De fach, la prefectura a rapelat l’edil a l’òrdre perque aquela aumentacion de salari complissiá pas lo còde general de las collectivitats territorialas. Lo Pontet es una vila de 15 000 abitants e, doncas, lo salari del cònsol pòt pas excedir lo 65% de l’indèx terminal de la foncion publica. Lo cònsol planguèt “una error materiala de l’administracion dins lo calcul”, segon çò que publiquèt lo setmanièr ultradrechista Minute.
 
Après son eleccion, Hébrard aviá anonciat sa volontat de far d’economias dins la comuna en suprimissent las ajudas d’accès a las cantinas escolaras per las familhas mai desprovesidas de la vila. “Fau responsabilizar lei parents d’escolans per li mostrar que tot es pas gratuit”, çò declarèt sus France Bleu.
 
A respècte de l’aumentacion de son salari, Hébrard l’aviá justificada: “l’indemnitat dau cònsol precedent èra anormalament bassa, e siam revenguts a una indemnitat normala”, çò diguèt Hébrard sus TF1, tot enfuscat perque lo jornalista l’aviá acusat de s’aumentar lo salari de faiçon illegitima. De fach, l’elegit ultradrechista aviá ja explicat endacòm mai qu’en venent cònsol, perdriá la mitat de sos revenguts, bòrd qu’aviá pas mai lo temps d’exercir sa profession a plen temps.