Estratobús (Stratobus), un veïcul susprenent, mitat dròne mitat satellit, a fòrça bon mercat, se fa a Canas. Serà capable de menar a tèrme un fum de missions, especialament l’observacion, la seguretat, las telecomunicacions, la radiodifusion e la navigacion, entre d’autres. Se tracta d’un dirigible de 5 tonas que pòt transportar fins a 200 quilogramas e qu’es capable de restar en vòl estacionari a 20 quilomètres del sòl, ben al dessús de l’espaci aerian. Es una idèa de Thales Alenia Space, una societat occitana resultant de l’ensemble de la francesa Thales e de l’italiana Finnmeccanica, en partenariat amb Zodiac Marine, lo CEA e Air Liquide. “L’avantatge màger es lo còst”, çò a explicat a Le Figaro lo cap de projècte Jean-Philippe Chessel. “Es una tecnologia que deuriá costar aumens dètz còps mens que lei satellits, segon lei nòstrei calculs”.
 
Aquela idèa occitana va un pas mai luènh que lo projècte Loon de Google, qu’emplega d’aerostats per menar Internet de pertot, pr’amor que, en lo cas d’Estratobús, s’agís de dirigibles motorizats que pòdon manténer lor posicion sens èsser emportats pel vent. L’alimentacion de l’engenh se fa amb d’energia solara.
 
Le Figaro ne publiquèt dimars passat un bèl reportatge.