Fins a fa gaire, se cercàvem “Isis” sus Google i trobàvem coma resultat un produch d’American Express, los sits de l’Institute for Science and International Security e d’ISIS Pharmaceuticals, al delà de las referéncias a la divessa egipciana. Mas a l’ora d’ara, los primièrs resultats son ocupats per l’Estat Islamic, ancianament ÈIIS, Estat Islamic en Iraq e Siria, que sa sigla en anglés es ISIS. Qualques marcas, qu’an pas enveja de partejar lo nom amb lo grop jihadista, an decidit de cambiar.
 
Lo cas mai clar es lo d’American Express, que lancèt en novembre passat un pòrtamoneda electronic amb lo nom d’ISIS Mobile semblable a PayPal e Google Wallet. Qualques meses puèi, sos dirigents an decidit de cercar un autre nom.
 
“Malgrat que siá una coïncidéncia, avèm pas cap d’interès a partejar lo nom amb un grop qu’es vengut un sinonim de violéncia e, de mai, los nòstres còrs son al costat dels que la patisson”, çò disiá Michael Abbott, director d’ISIS Mobile, dins un comunicat de premsa ont apondiá tanben: “Coma entrepresa, avèm decidit de renomenar lo nòstre produch”.