Las Illas Canàrias son en crisi institucionala amb l’estat espanhòl a causa de certanas prospeccions petrolièras que l’estat las vòl menar a tèrme e que lo govèrn autonòm de l’archipèla ne vòl pas. Dimècres passat, lo president Paulino Rivero anoncièt la convocacion d’un referendum per la tardor per que los canaris exprimiguèsson lor vejaire a prepaus d’aquelas prospeccions.
 
Rivero a demandat al parlament canari d’abilitar la primièra setmana de setembre per començar de tractar la convocacion de la consulta, que se voldriá far ben probable al mes de novembre al pus tard. Lo govèrn canari espèra que lo resultat del referendum mòstre clar al govèrn espanhòl l’oposicion de las Illas Canàrias a las prospeccions anonciadas vers las illas de Lanzarote e Fuerteventura, que comptan amb una fòrta oposicion.
 
Lo govèrn canari a demandat l’intervencion dirècta del rei per evitar çò que qualifiquèt de “divòrci” entre las Canàrias e l’estat espanhòl. Segon lo president canari, los accionaris de la societat Repsol, que deu organizar las prospeccions, li an fach saber qu’eles an pas grand interès de las far mas que son quichats pel govèrn espanhòl.