Las principalas bancas centralas del mond se preparan per çò que pòsca arribar après las eleccions grègas d’aqueste dimenge 17 de junh, e tanplan per prene de mesuras estabilizant lo mercat e evitant una restriccion del crèdit.

L’agéncia Reuters, en citant de fonts del G20 (que s’amassarà diluns en Mexic), ditz qu’en cas que i aguèsse de turbuléncias financièras après aquesta dimenjada, las bancas centralas son prèstas per assegurar pro d’argent.
 
Del sieu costat, lo president de la Banca Centrala Europèa (BCE), Mario Draghi, a assegurat qu’aportarà totjorn de liquiditat a las bancas “solvablas” de la zòna èuro quand caldrà, e a remembrat qu’a l’ora d’ara i a cap de risc d’inflacion dins cap d’economia dels païses de l’èuro. En una conferéncia a Francfòrt, Draghi diguèt que la BCE desvolopa lo “ròtle crucial” d’aportar de liquiditat a las bancas solidas en escambi de gatges adequats, aital o a fach pendent la crisi, “e aquò es çò que contunharem de far. L’eurosistèma contunharà d’aportar de liquiditat a las bancas solvablas quand caldrà”.