Dos òmes mòrts e un tresen òme en fugida es lo bilanç d’una fusilhada que se debanèt dissabte, a l’entorn de 20h30, a Montpelhièr, segon çò que rapòrta l’AFP. Un òme jove n’auriá abordat dos autres, jos lo pòrge d’un ostalòt del quartièr de Lemasson, en lor reprochant que l’agachavan de rèireuèlh. Sul pic dobriguèt lo fuòc e ne tuèt un. L’autre li prenguèt l’arma còp sec e tuèt l’agressor abans de fugir. La polícia lo cèrca en seguissent las indicacions dels testimònis.
 
Las doas victimas serián conegudas pels servicis policièrs per trafec d’estupefasents, qu’es la pista privilegiada dels enquestaires.
 
“Cal que lo reialme socialista se preocupe de la seguretat dels bens e de las personas a Montpelhièr e dins las vilas del Sud, tustadas pels reglaments de comptes sus fons de trafec d’estupefasents”, çò planguèt lo cònsol de Montpelhièr, Philippe Saurel, que demandèt al ministre francés de l’interior, Bernard Cazeneuve, de mandar “de 20 a 30 policièrs nacionals per refortir los efectius del comissariat central”.
 
Aquela fusilhada de dissabte seguís dos reglaments de comptes per arma de guèrra que se passèron a Tolosa los 14 e 15 d’agost. A Marselha se’n son debanats 15 dempuèi lo començament de l’annada.