Lo govèrn sirian de Bashshar Al Asad a dich qu’es dispausat a collaborar amb los Estats Units per luchar contra l’Estat Islamic. Dins aquel sens, Siria es prèsta a daissar los avions estatsunidencs bombardar de posicions jihadistas dins son territòri se i a de cooperacion mutuala. Arunan los Estats Units se mostravan prèstes per far la guèrra precisament contra lo govèrn d’Al Asad.

Ara que los Estats Units son a bombardar de posicions jihadistas sul Curdistan iraquian, lo ministre dels afars exteriors sirian, Walid Al Mulim, es dispausat a permetre que los avions intren dins lo territòri sirian, segon çò que rapòrta 3/24. Dins aquel sens Siria permetriá los bombardaments estatsunidencs se se fan dins l’encastre d’una accion coordenada internacionalament amb Damasc per eradicar lo terrorisme. Senon “seriá una invasion”, çò a dich Al Mulim. Pasmens, segon lo ministre, d’atacs aerians sufison pas per n’acabar amb l’Estat Islamic.
 
Recentament lo govèrn d’Al Asad a perdut l’aeropòrt d’Ar Raqqa, après qualques meses de combats amb los jihadistas. S’agís del darrièr grand aeropòrt que teniá a l’èst del país. Dins aquela batalha serián mòrtas aperaquí 500 personas.
 
Dins la guèrra de Siria, Washington a sostengut totjorn los rebèls, compausats mai que mai per de jihadistas. Lo govèrn estatsunidenc èra quitament dispausat a combatre contra lo govèrn sirian perque aqueste darrièr emplega d’armas quimicas. Aquela ofensiva se menèt pas a tèrme car Al Asad acceptèt de destruire tot l’arsenal quimic. Ara, Al Asad poiriá quitament èsser aliat dels Estats Units per lor interès comun de far front a l’Estat Islamic.