Los linfocits B son un compausant essenciau dau sistema immunitari: son las cellulas que fabrican los anticòrs contra los antigens, marcadors daus còrs estrangiers dins l'organisme coma los virus o las bacterias. Per zo far, devon decopar e recombinar lors gens. L'equipa dau professor Cogné e de Sophie Péron, pòstdoctoranta, an descubert un tipe de decopatge cromosomic jamai observat: los linfocits podon decopar lors gens per eliminar daus anticòrs. Mas coma podon pas viure sens quilhs gens, lo decoptatge es fatau per la cellula. Los cerchaires l'an baptizada recombinason suicidi.

L’enjuec de quela descuberta publiada dins las revisdas Sciences e Médecine Sciences es de comprener queu fenomen per lo poder mestrejar e luchar contra las allergias, las malàudias autoimmunas e los càncers. Faudrà que los cerchaires comprenhan coma quelas recombinasons suicidis permeton de seleccionar la subrevivéncia de las cellulas protectritz en tot eliminar las inutilas o las agressivas per los còrs (responsablas de las allergias o d’autoimmunitat). Lo mestritge de la recombinason permetrà maitot d’indusir volontariament lo suicidi de cellulas tumoralas (leucemias, linfomas) o responsablas de trebles de l’immunitat. De l’esper per los malaudes mas fòrça trabalh per los cerchaires.