Amb la mediacion d’Egipte, Israèl e Gaza an convengut d’aturar la guèrra d’un biais permanent. Lo president de l’Autoritat Nacionala Palestiniana, Mahmud Abbas, confirmèt ièr de ser l’acòrdi, que son govèrn sosten. “Lo desastre en Gaza es delà l’imaginacion”, çò diguèt, en revendicant que lo prètzfach principal siá la reconstruccion. Abbas tanben mercegèt per lors ròtles Qatar e lo secretari d’estat estatsunidenc John Kerry dins las negociacions indirèctas que se son menadas amb la mediacion d’Egipte.
 
L’alta al fuòc comencèt ièr a 18h00. L’acòrdi prevei un aleujament parcial del blocatge a l’entorn de la Lista de Gaza, que permetrà lo passatge d’ajuda umanitària e de material de construccion, qu’Israèl supervisarà. La zòna de pesca de Gaza serà mai larga. De son costat, l’Hamas, que govèrna en Gaza, s’es engatjat a metre fin als tirs de roquetas e recebrà pas de fonzes. Dins un mes se negociarà la dobertura del pòrt e de l’aeropòrt de Gaza.
 
De milièrs de ciutadans de Gaza sortiguèron ièr per carrièras en manifestar lor jòia per la fin de la guèrra. Lo ministre del govèrn, Ismail Haniyya, anoncièt l’alta al fuòc coma una “victòria de la resisténcia palestiniana”, segon çò que rapòrta l’agéncia Al Ray.
 
Aital se met fin a cinquanta jorns de guèrra que i son mòrts 68 israelians, la majoritat de militars, e mai de 2000 palestinians, la majoritat de civils.