Après denonciar que i a de soldats russes qu’ajudan los milicians prorusses de las regions de l’èst d’Ucraïna, lo govèrn ucraïnés anoncièt que vòl trencar sa neutralitat e qu’es a preparar son intrada dins l’OTAN, segon un comunicat publicat divendres passat. Aquel jorn, lo govèrn mandèt un projècte de lei al parlament per que lo país renóncie a l’estatut neutral d’ara. Còp sec, lo secretari de l’aliança atlantica, Anders Fogh Rasmussen diguèt qu’Ucraïna pòt far partida de l’OTAN “s’o desira e complís los requisits”.
 
Russia a pas respondut lo movement del govèrn ucraïnés, e mai se lo president rus, Vladimir Putin, remembrèt que son país es una poténcia nucleara, e comparèt la situacion actuala amb l’invasion nazi de l’Union Sovietica pendent la Segonda Guèrra Mondiala.
 
Dempuèi lo començament del conflicte a las regions orientalas d’Ucraïna i a ja agut aperaquí 2600 mòrts, segon çò qu’a calculat l’ÒNU.