Aqueste estiu avèm raportat la mòrt del jove Michael Brown, fusilhat per la polícia de Ferguson (Missorí), un incident qu’a levat fòrça protèstas pel racisme existent dins la societat estatsunidenca. Mas las mòrts en mans de policièrs son pas una excepcion als Estats Units. Aquò es çò qu’ensaja de demostrar dempuèi dos ans Brian Burghart, lo capredactor de la revista locala Reno News & Review, amb una vast a banca de donadas indicant totes los “rescontres fatals” protagonizats per la polícia dins aquel país, de l’an 2000 fins ara.
 
I a de milièrs de cases repertoriats, tant per Burghart coma per de collaboradors que l’ajudan a i introduire mai de donadas. De fach, dins una entrevista a Gawker, Burghart assegurava qu’el meteis aviá dos mila cases de mai dins lo disc de son ordenador, que los aviá pas encara pogut introduire.
 
I denonciava tanben las dificultats que trobava el, coma e los autres participants, per trobar las informacions: “L’ensenhament mai gròs qu’ai aquerit, amb tot aquò, es una causa que jamai poirai pas provar, mas que ne soi del tot convencut: la manca de donadas dins aquel domeni es intencionala. Cap de govèrn o d’administracion vòl pas que se sàpia quantas gents tua, ni perqué”.
 
En contrast, Burghart considèra qu’aver una banca de donadas coma la que s’esfòrça de crear, vasta e de bon utilizar, pòt “permetre non solament de comprene melhor aquela sòrta d’incidents, mas tanben de formar melhor la polícia e, fin finala, de reduire lo nombre de mòrts”.