Cossí serà la bandièra del Reialme Unit après l’independéncia d’Escòcia? Aquò es una question que fa perpensar dempuèi longtemps de mèdias e d’especialistas en grafisme e simboligia britanics. Los grafistas Quentin Newark e Kevin Denoual an preparat cinc proposicions per la bandièra britanica sens Escòcia. Qualques proposicions seguisson un modèl logic seguent l’istòria dels simbòls britanics. Mas d’autras son estonantas de verai.
 
La bandièra britanica actuala, dicha Union Jack, nasquèt de l’integracion de las bandièras de la crotz de Sant Andrieu escocesa, de la crotz de Sant Jòrdi anglesa e de la crotz de Sant Patrici irlandesa. La bandièra la creèt en 1606 lo rei Jaume, un sègle abans l’union entre Anglatèrra e Escòcia (1707). E foguèt pas adoptada oficialament coma bandièra de l’union abans 1801. Galas i es pas representada perque, quand apareguèt la primièra version oficiala de la siá bandièra, s’èra ja joncha amb Anglatèrra. La bandièra del País de Galas, un dragon roge sus un fons blanc e verd, es del sègle XV.
 
Dins lo libre blanc sus l’Escòcia independenta, lo govèrn escocés anonciava que la bandièra del nòu estat seriá la bandièra de Sant Andrieu. Aquel simbòl a coma origina legendària lo martiri de l’apòstol crestian Sant Andrieu, e apareguèt per lo primièr còp al Reialme d’Escòcia en 1180 jos lo règne de Guilhèm Ir. Aquel imatge tornèt aparéisser suls sagèls que s’emplegavan a la fin del sègle XIII. En 1286 èra un simbòl utilizat pels Gardians d’Escòcia (caps d’estat de facto).