Aprèp la desfaita pietadosa a Salford e la mesa a l’escart de Leon Pryce, del temps que Leeds s’emportava la Cup, los Dracs agèron dreit a doas setmanas d’entraïnament intensiu per tornar trapar solidaritat e sistèma de jòc. L’escasença de constatar la qualitat del trabalh fait se presentava aqueste darrièr dissabte d’agost amb la venguda dels paures London Broncos (una sola victòria dins la sason) a Brutus. Dijòus de ser, sus sa pelena, Warrington tornèt de 23-6 a una egalitat a 24 pertot amb los Gigants d’Huddersfield. Divendres, Saint Helens confirmèt definitivament sa primièra plaça amb una victòria sul fial 13-12 a Leeds, que resistiguèt una orada a dotze contra tretze.
 
Widnes aviá pas tremolat per prene lo pas sus Wigan: 24-10 mentre qu’Hull KR comprometiá quasi definitivament son eventuala qualificacion per las pelhòfas amb una desfaita pivelanta cò del vesin d’Hull FC: 28-0.
 
Los Dracs prenguèron la partida del bon costat: una defensa solidària e solida, sosten al portaire de pauma, la bona complementaritat del novèl parelh de mièges Bòsc-Williams, un bon jòc al pè. Vincenç Duport se faguèt traucadefensa e los Dracs en fisança marquèron sièis ensages dins lo primièr temps; Morgan Escarré ne profeitèt per ne rajustar tres dins sa saqueta e tornar atal a nautor dels melhors marcaires de la sason de Superliga. Tomàs Bòsc enquilhèt cinc de las sièis transformacions: 34-0 a la pausa. Coma plan sovent dins las partidas d’aquela mena, l’intensitat demorèt al vestiari e los Dracs baissèron de ritme dins lo segond temps. Las aproximacions apareguèron. London ne profeitèt per signar un ensag en cap de linha. Los Dracs tornèron quichar sus l’accelerador en fin de partida per marcar dos ensages suplementaris per Taia e Milard. Victòria finala: 46-0.
 
Los Dracs sèrvan atal la setena plaça al classament: 25 punts e +26 a la diferéncia de punts. Widnes es oiten amb 25 punts e –104; Hull KR se trapa a quatre punts: 21 punts e –44, en companhiá de Wakefield: 21punts, –165.
 
Los Dracs serián plan inspirats d’anar quèrre un resultat positiu dimenge de vèspre cò d’Hull KR per validar definitivament la bilheta de la qualificacion catalana per las pelhòfas. A la meteissa ora, los Vikings seràn a Bradford. En cap de classament, doas partidas bèlas son al programa: Saint Helens-Warrington dijòus e Wigan-Leeds divendres.
 
En Austràlia, lo darrièr torn de classament serà decisiu: matematicament, sièis esquipas son encara en corsa per las quatre darrièras qualificacions per las fasas finalas. En avantast d’aquelas fasas finalas, un prometeire Pols-Lapinons aqueste dijòus a Sydney, una partida de tria.
 
Al país, dissabte de vèspre, lo Tolosa Olimpic ganhèt lo Trofèu Aillères amb una victòria contra l’FC Lesinhan 22-0 dins un mièg temps de mièja ora. Los lesinhaneses presentaràn la formacion novèla verda e blanca aqueste divendres en fin de vèspre al Palais del las Fèstas de la capitala de laas Corbièras. Dissabte, a 5 oras e mièja del vèspre, l’AS Carcassona jogarà una partida amicala a Palau, una esquipa catalana que tornarà trapar la setmana seguenta sus la meteissa pelena pel compte de la primièra jornada del campionat. Dimenge a miègjorn, jogaires, dirigents e sostens son convidats a una granda paella a l’Estanh de la Cavalhèra per refortir los ligams de totas las compausantas del club.
 
 
Un libre bèl sus la tornada legendària de 1951 en Austràlia
 
De senhalar la publicacion d’un libre bèl sus la virada legendària de 1951 en Austràlia, libre escrit a partir de la correspondéncia mandada a sa familha pel segonda linha de Carcassona: Edoard Ponsinet. L’istòria comptada de l’interior del grop. Un libre prigondament esportiu, prigondament uman…
 
Lo titol de l’obratge: Édouard Ponsinet raconte 1951, la tournée héroïque de l’équipe de France de rugby à XIII en Australie et Nouvelle-Zélande (ed. Edilivre).
 
 
 
 
Alan Roch