Las societats de bièrra Stella Artois e Bass, de tè Twinings, de petròli Shell, d’automobilas Peugeot, d’alimentacion Heinz e de jeans Levi Strauss an un element en comun: lors logotipes son dels mai ancians encara en usatge a l’ora d’ara e demòstran, doncas, l’importància qu’a agut l’imatge grafic longtemps abans las campanhas de marqueting global, las anóncias televisivas e los rets socials.
 
Lo d’Stella Artois, segon çò que rapòrta aqueste article de 24/7 Wall St., es lo mai veteran de totes, amb una brava diferéncia, pr’amor que comencèt de s’emplegar fa sièis sègles e mièg, en 1366. Lo seguent mai vièlh es lo de Twinings Tea, una societat fondada en 1706 que comencèt d’emplegar lo logotipe actual en 1887.
 
Lo fach que totes aqueles logotipes ajan almens mai d’un sègle d’istòria entraïna, en qualques cases, que l’element representat sul dessenh aja pauc a veire amb l’activitat de la societat. Es lo cas de la societat d’energia Shell, amb una cauquilha coma logotipe, remembrança de l’origina marinièra de l’entrepresa: al començament se consagrava al transpòrt maritim de querosèn en Índia, que d’alin ne tornava amb de cauquilhas per las vendre en Euròpa.