Lo portal Internet Archive ven de far un present enòrme a tota la comunautat dels internautas: a començat a cargar sul sieu compte de Flickr catòrze milions d’imatges istorics. En concret, s’agís d’illustracions, de dessenhs, de cartas, de mapas e de fòtos qu’apareisson dins los dos milions de libres de domeni public, que los aviá escanerizats l’Internet Archive, e que foguèron publicats entre 1500 e 1922.
 
E mai se l’Internet Archive es conegut sustot per aver preservat fins ara mai de 400 000 milions de paginas web, dispausa tanben d’un sector amb 600 milions de paginas de tèxt numerizat de publicacions istoricas.
 
Per las escanerizar s’empleguèt un logicial de reconeissença optica de caractèrs adaptat als tèxtes, mas pas gaire bon pels imatges. Foguèt lo cercaire Kalev Leetaru, de l’Universitat de Georgetown, qu’introduguèt una modificacion dins aquel logicial per que tanben escanerizèsse corrèctament totes los imatges qu’apareisson dins los dos milions de libres electronics d’aquela bibliotèca istorica numerica, qu’an començat a se cargar sus Flickr.