Bona novèla: al mes de junh, lo XIII de França se pòt sortir la tripas e jogar una bona partida. E òc, la tòca de las formacions nacionalas es de preparar al melhor la Copa del Monde de la tardor de 2013 (dins mens de 500 jorns).

 

Aquò explica que, dissabte a Wrexham, los Galleses presentavan una formacion sens les exiliats dels Antipòdis e França sens los cap de fila dels Dracs e amb 4 novèls jogaires dposats dins las equipas d’Elita (Guiraud, Soubeyras, Maria e Larroyer).

 

Los mièges catalans Barthau e Bòsc a la manòbra lancèron l’arrièr Stacul a l’ensag al quart d’ora de jòc, puèi, a la mièja-ora, lo capitani Monís passava en fòrça per anar s’espatarrar entre los pals: 12-0 pels Blaus. Los Diables Roges se’n sortissián plan que l’arbitre refusava tres realizacions als Blaus e que marcavan abans de tornar al vestiari: 12-4. Mas, a la represa, lo pilar Griffi marcava dos còps. Cada còp, los Roges replicavan. Lo darrièr mot èra per Stacul e los Blaus podián levar los braces cap al cèl en signe de victòria: 28-16. Lo revenge es previst en Occitania pel mes d’octobre.

 

D’aquí-la, l’entrainaire de l’equipa de França serà benlèu enfins designat: Aurelian Cologni (Lesinhan) e Tierric Dumaine (Pòl Espers) an assegurat amb bonur l’interim per aqueste rescontre.

 

Los angleses an causit de jogar doas partidas contra la formacion dels Exiliats, los melhors jogaires dels Antipòdis de la Super-Liga. Dissabte en fin de vèspre, a Sant-Helens, lo menaire de jòc d’aquela formacion èra lo mesclanha australian dels Dracs Scott Dureau que foguèt a l’origina dels dos ensags de son equipa. Faguèt marcar lo segond a son collèga jos las colors catalanas, Millard. Los Angleses comptèron sus la fòrça del paquet e sul fosilh Tomkins per assegurar la victòria: 18-10. Partida revenge programada lo 4 de julh a Huddersfield.

 

La dimenjada internacionala s’èra entamenada divendres en Anglatèrra amb las desfachas de l’equipa de França juniòr 38-18 e de l’equipa feminina 48-0 fàcia a lors omològas anglesas. D’esperar que las resultas al Bac seràn mai positivas per plan dels juniòrs d’aquesta equipa blava!

 

Dissabte, a Lion, l’equipa de França dels jogaires de Federala a pres lo melhor sus la formacion de Serbia: 42-26, dins una brava partida que marca lo desvolopament e l’espandiment europèu del XIII. 

 

Aquesta fin de setmana, divendres 22 en serada, retorn sus la pelena pels Dracs qu’aprèp aquesta pausa internacionala an a se faire perdonar una debuta del mes de junh pas tarribla, marcada per las desfachas a Salfòrd e fàcia a Wigan. Mas serà pas simple: al Craven Park, Hull KR va esperar nòstres sang e aur de pè fèrme!!!

 

Aqueste dissabte, la Federacion tendrà son congrès a Salon de Provença.

 

La segonda Universitat del Rugbi, organizada pel Cèrcle Rugbi Galilèu, se tendrà dissabte e dimenge a Font-romeu (Païses Catalans).

 

Claudi Alranq presentarà sas galejadas rugbisticas "Rugby-Club Village" divendres 22 a Grussan (21h, plaça de la Glèisa) e dimenge 24 a Posòls de Menerbés (17h30).




Alan Roch