L’Estat Islamic publiquèt sus YouTube ièr de ser un vidèo mostrant la decapitacion del jornalista estatsunidenc Steven Sotloff, segon çò qu’a publicat lo centre estatsunidenc SITE de velha dels sits islamistas. Sotloff foguèt enlevat en julhet de 2013 al nòrd de Siria. Trabalhava per la revista Time, per la CNN e per Fox News.
 
Lo vidèo es estat retirat còp sec, ça que la l’an tanben recebut divèrsas agéncias d’informacions.
 
Suls imatges se vei un òme cagolat que tanben menaça d’executar un ostatge britanic, nomenat David Haines, e avertís los govèrns de sosténer pas “l’aliança diabolica d’America contra l’Estat Islamic”, segon çò que rapòrta Le Monde. Per ara l’Ostal Blanc a pas pogut confirmar l’autenticitat de l’enregistrament.
 
Aqueste assassinat d’Steven Sotloff, filmat e publicat sul ret, seguís lo de son collèga James Foley que se passèt doas setmanas abans. 
 
 

fffff		fffff
	Amnestia internacionala e l’ÒNU condemnan las violacions dels dreches umans     Amnestia Internacionala e l’ÒNU an condemnat, d’un biais net e clar, las violacions continuas dels dreches umans que son a menar a tèrme los jihadistas de l’Estat Islamic.   Dins aquel sens, l’ÒNU a aprovat a l’unanimitat de mandar d’un biais urgent una mission al nòrd d’Iraq per examinar los crimes dels terroristas ultrareligioses e per ne combatre l’impunitat. Aquela resolucion s’es adoptada a la demanda d’Iraq e de França, per d’actes “d’un nivèl inuman inimaginable”, segon çò qu’a dich la nauta comissària pels dreches umans, Flavia Pansieri.   De son costat, Amnestia Internacionala denóncia una campanha sistematica de netejatge etnic. Segon l’organizacion, l’Estat Islamic a transformat las zònas ruralas en vertadièrs camps de la mòrt. Aqueles masèls cèrcan d’escafar tota traça de personas que sián pas musulmanas sunnitas.   Segon las donadas de l’ÒNU, solament dins lo mes d’agost son mòrtas ailà 1420 personas.