Sofia Montelh, Antoine Finòs, Edith Seguièr, Lisa Fraresso e Anaïs Gaux son cinc liceans de l’Isla de Baish (Savés) que collabòran a l’enregistrament del primièr disc de la musiciana aranesa Alidé Sans, que sa publicacion es prevista en octòbre.

Los joves musicians an rescontrat l’artista a Barcelona aquestes diluns e dimars passats. An collaborat amb la batariá, la bassa, lo piano, la flaüta e las voses a la version de la cançon Es Caulets, una adaptacion d’Alidé Sans de la version aranesa d’aquel aire tradicional occitan.

Menats per lor professor d’occitan Nicolau Rei-Bèthvéder, los joves musicians saveses seguisson las iniciativas que se fan entre los licèus de l’Isla de Baish, Sant Gaudenç (Comenge) e Aran. “L’aviéner de l’occitan se pòt concéber que dab l’adesion de la joenesa”, çò diguèt a Jornalet Rei-Bèthvéder en tot apondre que “s’agís d’aviar aquestes liceans a har concèrts en occitan. Atau, lo grop d’adolescents lislés, Leviathan (E. Seguièr e A. Finòs), poirián interpretar produccions en lenga d’òc dins concèrts. Alidé e los cinc gojats e gojatas haràn un concèrt en la Vath d’Aran, lo 16 de mai, davant un centenat de joens deus licèus de l’Isla de Baish, Sant Gaudenç e Vielha. La cantaira aranesa a comprés de plan l’interès d’associar autes gojats, parièr se son de l’aute costat de la termièra, entà har creacions actualas.”

Los escambis entre los joves araneses de la rèsta de Gasconha seguiràn lèu. “Un cinquantenat de liceans comengés e de Savés seràn aculhits peu licèu d’Aran entà passar ua setmaneta en occitan, a la prima”.