La Banca Centrala Europèa a decidit de rebaissar las taxas d’interès a un nòu minim istoric d’un 0,05%. Dins sa reünion mesadièra a Francfòrt, lo conselh de la BCE, presidit per l’italian Mario Draghi, a estonat amb una retalhada d’una decimala en las taxas, qu’èran al 0,15% dempuèi lo mes de junh. La tòca es d’impulsar la recuperacion economica dins la Zòna Èuro. De mai, la BCE a rebaissat de 10 ponches las taxas qu’afèctan la facilitat de prètz marginal, fins al 0,3%, e a fach çò meteis amb las taxas que s’aplican a las bancas per far de depauses a Francfòrt, que dempuèi junh èran negatius. Passaràn del –0,1% al –0,2%.
 
Dins una conferéncia de premsa, lo president de la BCE, Mario Draghi, anoncièt ièr tanben un nòu programa de crompa de deute, tan public coma privat, que començariá ja a partir d’octòbre. Lo programa cromparà de titolizacions (ABS) simplas e transparentas. Draghi evitèt de confirmar la chifra exacta del programa, mas admetèt que poiriá èsser semblable a las informacions qu’an aquerit qualques mèdias, que dison 500 miliards d’èuros.
 
Draghi justifiquèt la nòva reduccion de las taxas d’interès coma una mesura per favorizar la creissença economica e evitar un efièch negatiu ligat a la bassa inflacion. Totun, reconeguèt que la decision s’es presa per “majoritat” e non pas a l’unanimitat. De fach, Alemanha refusa la politica de flexibilizacion monetària que promòu la BCE. Draghi diguèt que, en tot cas, la reduccion de las taxas es arribada al minim possible e que se reduiràn pas pus.
 
Pendent la conferéncia de premsa, l’italian anoncièt tanben las prediccions ecnomicas de la BCE per la Zòna Èuro. Segon los calculs de Francfòrt, l’economia creisserà del 0,9% en 2014, e de l’1,6% en 2015. Tocant l’inflacion, la BCE prevei que siá al 0,6% ongan, e qu’arribe a l’1,1% l’an que ven. Mas aqueles indicadors son luènh de l’objectiu del 2% que se prepausa la BCE.
 
Après l’anonci de Mario Draghi, l’èuro a davalat a son nivèl mai bas dempuèi junh d’arunan, e se cambiava contra 1,2996 dolar.