Lo secretari d’estat francés del comèrci exterior, de la promocion del torisme e dels franceses a l’estrange, Thomas Thévenoud, demissionèt ièr de ser, “a sa demanda [e] per de rasons personalas”, en tot èsser remplaçat per Matthias Fekl, deputat socialista del departament d’Òlt e Garona (Agenés).
 
Segon d’informacions de l’Express, Thévenoud auriá omés de declarar sos revenguts e seriá somés a una procedura de taxacion d’ofici.
 
De fach, après lo comunicat de l’Elisi, lo gabinet de Valls faguèt saber la demission de Thévenoud. En mai d’aquò, L’Express ditz que dins aquela situacion se tractariá “de problèmas de conformitat amb los impòstes”, segon çò qu’a aprés aquel jornal d’una font governamentala. En seguissent las “nòvas nòrmas installadas pel govèrn dins l’encastre de la vida politica, s’es confirmat que i aviá un problèma de declaracion d’impòstes”, çò apondèt aquela meteissa font, que precisèt qu’“en cap de cas” èra “per un motiu de desacòrdi politic”.
 
Aquel cambiament al govèrn francés l’anoncièt ièr l’Elisi, nòu jorns après lo cambiament de govèrn. De fach Thévenoud arribèt a la carga justament a aquel moment d’aquí, quand, amb la crisi del govèrn francés, lo primièr ministre Manuel Valls remplacèt los ministres critics amb sa politica economica.