Las convèrsas, debanadas en Argeria, amassan lo govèrn malian e sièis grops azawadians. Las organizacions politicomilitaras d’Azawad signan un acòrdi per metre fin a lors ostilitats. Mali defend una descentralizacion sens institucions autonomicas.

Divèrses grops politicomilitars d’Azawad e lo govèrn de Mali comencèron la setmana passada lo segond torn de negociacions, amb la mediacion d’Argeria, per trobar una solucion al conflicte del país. Tres dels movements azawadians (l’MNLS, l’HCUA de majoritat toarèga, e lo MAA de majoritat aràbia) s’adreicèron dijòus passat als participants de la segonda fasa del procès de negociacion, a Argièr, en demandant un acòrdi que permetèsse “al pòble d’Azawad de prene las retnas de son destin a travèrs d’un estatut especific”.
 
Las caracteristicas e los contenguts d’aquel “estatut especific” aluènhan, fins al jorn d’uèi, los movements azawadians del govèrn malian. L’MNLS, l’HCUA e lo MAA renóncian a l’independéncia d’Azawad mas en contrapartida vòlon una autonomia per las tres províncias del nòrd malian: Tomboctó, Kidal e Gao. Per contra, Mali ditz qu’es dispausat a acceptar una descentralizacion cap a las províncias de tot l’estat; mas se mòstra reticent a la creacion d’una o de plusors assembadas e govèrns autonòms en Azawad.
 
En mai de la coordinacion MNLA-HCUA-MAA e de Mali, participan tanben a aquelas negociacions d’autres grops politicomilitars d’Azawad, coordenats entre eles e considerats pels analistas coma mai pròches del govèrn malian. S’agís del CPA (de majoritat toarèga e digirit per Ibrahim Mohamed Salah, dissident de l’MNLA), la CMFPR (una coalicion de majoritat songai e pul) e lo MAA dissident (de majoritat aràbia). Lo jornal argerian Al Watan escriu qu’Ibrahim Mohamed Salah auriá prepausat lo modèl del Curdistan autonòm d’Iraq coma referent.
 
Dins los meses precedents, qualques unes d’aqueles grops se son afrontats amb las armas. La setmana passada, a Ouagadougou (Burkina Faso), tant la coordinacion MNLA-HCUA-MAA coma la coordinacion CPA-CMFPR-MAA dissident signèron un acòrdi per quitar las ostilitats. Atanben, las doas coordinacions reconeguèron “la legitimitat de la lucha” d’Azawad “dempuèi mai de 50 ans” per aténher “un estatut especific”.
 
Aqueles grops mòstran las divisions politicas, ideologicas, etnicas o clanicas dedins Azawad e an de relacions amb Mali, amb son armada o amb d’estats vesins. La division entre los grops, e lo perilh de non-govèrn que ne deriva, son d’arguments malians per refusar de concedir l’autonomia a Azawad.
 
 
 
 
 
 
Aquesta nòva es adaptada del jornal catalan Nationalia, amb qui Jornalet a un acòrdi de cooperacion.