Se met uèi en venda dins lo Reialme Unit lo libre Naming Jack the Ripper (En nomenar Jack l’Esventraire) de Russell Edwards, que conten las donadas de sa recèrca sul famós assassin londinenc. La promocion que se fa del libre anóncia qu’ofrís la primièra pròva fisica dels crimes de l’assassin qu’a inspirat tant de romans e de filmes. De fach l’autor promet que, gràcias a las tecnicas de la medecina legista, lo libre pròva l’identitat de l’assassin.
 
Dins aquel libre, Edwards i assegura que l’esventrare èra un immigrant polonés nomenat Aaron Kominski, e que moriguèt dins un asil d’alienats en 1919. Kominski foguèt un dels suspèctes qu’Scotland Yard enquestèt dessús, mas en 1888 lo disculpèron per manca de pròvas.
 
L’escrivan aviá crompat a l’enquant fa qualques annadas un chale qu’auriá abilhat una de las cinc victimas de l’esventraire e lo faguèt analisar per un expèrt en ADN. I trobèron de rèstas biologicas de l’assassin e de la femna assassinada, que las comparèron amb l’ADN d’un descendent d’Aaron Komisnki. Segon Edwards, los resultats son conclusents.