Aperaquí 120 milions de dròllas, de mens de 20 ans, an patit de violéncias sexualas, segon un rapòrt de l’AFP que publica Libération. Lo mèdia francés remarca qu’aquò afècta una dròlla sus dètz. Al delà, es de remarcar tanben qu’un omicidi sus cinc en 2012 es estat lo d’un enfant. Aquelas donadas espantantas las an tiradas d’un rapòrt de l’UNICÈF entitolat Hidden in Plain Sight (Amagat de la vista). L’organisme publica “lo collectatge de donadas mai important jamai efectuat” sus las violéncias que patisson los enfants del Mond.
 
Es en Africa Subsahariana que las dròllas son mai expausadas a patir de violéncias sexualas. Demest las adolescentas qu’an entre 15 e 19 ans, una sus tres son estadas victimas de violéncias emocionalas, fisicas o sexualas, perpetradas per un marit o partenari que rarament elas l’an causit. La Guinèa Eqüatoriala e la Republica Democratica de Còngo son los païses qu’aquelas practicas crusèlas i se son mai estendudas.
 
Una autra conclusion d’aquel rapòrt es que quasi la mitat de las victimas de las violéncias sexualas, aperaquí 126 milions, creson qu’es normal e justificat que lors òmes las batan o las fòrcen.
 
Tocant los omicidis d’enfants, la granda majoritat se passan dins de païses paures, mai que mai en America del Sud e dins lo centre-sud d’Africa, e especialament en Nigèria. Entre los païses occidentals, los Estats Units son los primièrs per los omicidis de menors de mens de 20 ans.
 
Una autra donada espantanta, son los enfants que patisson de castigs corporals venent de las personas que s’ocupan d’eles: 6 enfants sus 10, entre 2 e 14 ans. Mas aquelas donadas representan solament “una estimacion minimala del problèma”, segon l’UNICÈF. La majoritat de las victimas accèptan pas de s’exprimir.