Se vos agrada de vos passejar près de la mar, s’avètz pas d’allergias, se vos agrada l’ivèrn o beure de vin de Champanha d’aquela region francesa, se vos agrada de manjar d’ustras… alavetz seretz plan interessats per la guida que ven de publicar la revista Matter amb las trenta tres causas que desapareisseràn o cambiaràn radicalament a causa del calfament de la planeta e del cambiament climatic. Segon çò que ditz la revista, aquela lista se basa sus d’estudis scientifics reals pertocant la manièra que variarà la planeta d’aicí a mièg sègle e al delà. “Prenètz-la coma una guida de la bona vida abans que siá fonduda pel cambiament climatic”.
 
Devesida en seccions de continents (l’America del Nòrd e l’America del Sud, Artida, lo Pacific sud, Asia, Africa e lo Pròche Orient e Euròpa), la lista avertís que dins qualques decennis se poirà pas mai vesitar lo celèbre Centre Espacial Kennedy de la NASA a Cap Canaveral (Florida) o que Las Vegas demorarà sens aiga e, probable, sens abitants ni vesitaires.
 
Serà tanben engolit jos la mar lo Pòl Nòrd, en Artida, e l’iconica bastissa de l’opèra de Sydney, en Austràlia. Los estatsunidencs qu’aiman los pastissons de cerièras patiràn per ne trobar e los beveires compulsius de cafè, se son pas fòrça rics, ne quitaràn probablament la dependéncia.