Anders Behring Breivik, autor del masèl d’Utøya e de l’atemptat d’Òslo, ditz que s’es “convertit” a la democracia e qu’aital vòl defendre son ideologia racista e islamofòba sens cap de violéncia, segon un rapòrt de l’AFP que publica Libération. Segon un corrièr de 33 paginas que l’agéncia francesa recebèt de Breivik, l’assassin d’Utøya ditz que vòl crear un partit politic “faissista” per portar son combat dins lo sistèma democratic. En mai d’aquò, lança “un ultimatum” al Ministèri norvegian de la Justícia en demandant que lève los obstacles que li an mes per l’empedir de fondar lo “Partit Faissista Norvegian” (NFP) e la “Liga Nordica” (NL).
 
Breivik es condemnat a 21 ans de preson e en Norvègia los detenguts sèrvan totes lors dreches civics. Ça que la, el denóncia que li confiscan las letras destinadas a amassar las signaturas necessàrias per enregistrar son partit. De lor costat, las autoritats penitenciàras desmentisson aquela acusacion mas explican qu’elas devon censurar los corrièrs dels detenguts susceptibles d’incitar a de faches criminals.
 
En 2011, Breivik faguèt esclatar una veitura bomba al centre d’Òslo, çò que tuèt uèch personas e ne feriguèt mai de dos cents. Anèt après a l’illa d’Utøya, ont los joves del Partit Trabalhista Norvegian fasián un acamp e, abilhat de policièr, n’assassinèt 69 en los fusilhar. Breivik, qu’a 32 ans, es un ancian militant del Partit del Progrès (FRP), d’extrèma drecha. Considerava que los joves que participavan al campament d’estiu en l’illa d’Utøya èran “de traites en favor de l’immigracion”.
 
Dins lo jutjament confessèt èsser l’autor d’aquel masèl; diguèt que planhiá d’“èsser pas anat mai luènh” e qu’agiguèt “perque èra de besonh”. Breivik reconeguèt pas l’autoritat del tribunal que l’aviá jutjat. La jurada lo condemnèt a la pena maximala, 21 ans de preson, amb la possibilitat de los prorogar. La jurada l’acusèt a l’unanimitat d’“actes de terrorisme” e lo declarèt en bon estat de santat mentala. Aital, doncas, complís pas la pena dins un espital psiquiatric, mas dins una preson.