Los socialistas del PASOK an decidit de participar al govèrn d’unitat amb Nòva Democracia (drecha). Syriza (esquèrra radicala) es lo segond partit mai votat, a 2% e 8 sètis de Nòva Democracia. Esquèrra Democratica se prepausa per far un tripartit en favor del salvament europèu.

Lo partit de drecha Nòva Democracia a ganhat las eleccions grègas: aurà 129 sètis, los 79 qu’a capitat amb los vòtes e los 50 que la lei electorala grèga ofrís al partit qu’obten mai de deputats. Darrièr se tròba la coalicion d’esquèrra radicala Syriza, amb 71 sètis, 2% dejós. En chifras absoludas, solament 170 000 vòtes an separat Nòva Democracia de Syriza, sus un total de 6,2 milions de votants.
 
Just al moment de saber lo resultat, Nòva Democracia prepausèt de far govèrn amassa als socialistas del PASOK, la tresena fòrça, amb 33 sètis. Los deputats dels dos partits superarián la majoritat absoluda de 151 sètis; mas lo PASOK a pas encara decidit çò que farà. Nòva Democracia recebèt ièr la comanda de formar govèrn de la part del president Karolos Papoulias.
 
Darrièr los tres partits principals, i a: lo Partit dels Grècs Independents, de drecha e opausat al salvament europèu, amb 20 deputats; los nazis de Chrysi Avgi (Alba Daurada), qu’an 18 deputats en tot manténer lo meteis percentatge de vòte que fa un mes, quitament se los sondatges o previsián pas; l’Esquèrra Democratica, amb 17 deputats; e lo Partit Comunista amb 12.
 
En comparason amb las eleccions de mai, Nòva Democracia a ganhat 21 sètis, Syriza n’a ganhats 19, lo PASOK n’a perduts 8, los Grècs Independents n’an perduts 13, los nazis n’an perduts 3, l’Esquèrra Democratica n’a perduts 2 e lo Partit Comunista n’a perduts 14.

En aquel sens, lo president del partit conservador Nòva Democracia, Antonis Samaras, a convocat los partits politics grècs a la formacion d’un govèrn de coalicion, e mai s’a soslinhat que los grècs an decidit de contunhar dins l’èuro. “Convidam totas las fòrças que partejan aquelas conviccions a participar dins un govèrn de salvacion nacionala. I a pas de temps a pèrdre. I pas cap de plaça per las politicas de partit”, çò aduguèt Samaras al sieu discors ont proclamèt la victòria, dins la sedença de Nòva Democracia a Atenas.
 

Nòva Democracia e lo PASOK faràn un govèrn de coalicion

Evangelos Venizelos, candidat del PASOK, a anonciat que uèi i aurà un govèrn de coalicion amb lo partit conservador Nòva Democracia. Après s'amassar amb lo candidat conservador, Antonis Samaras, Venizelos a explicat qu'èran d'acòrdi al "besonh de formar un govèrn immediatament". "Nos cal donar un image seriós a l'interior e a l'exterior", çò diguèt lo socialista.
 
La diferéncia entre los dos partits, que dominan la politica grèga dempuèi de decennis, son importantas, malgrat que partejan lo sosten al salvament europèu. Per exemple, son pas d’acòrdi sus la politica fiscala que cal aplicar o sus la reduccion de foncionaris, ont Nòva Democracia es fòrça mai radicala que los socialistas. Per çò qu’es de l’immigracion, un dels ponches clau de la campanha, an tanben de fòrtas diferéncias perque Nòva Democracia es partidària de fòrabandir d’immigrants massissament, e lo PASOK o refusa.
 

Syriza farà una “oposicion onorabla”
 
Lo dirigent de la coalicion d’esquèrra radicala Syriza, Alexis Tsipras, a anonciat que farà una “oposicion onorabla”, en reclamant de tornar negociar los paches amb l’Union Europèa. Tsipras a dich que i aurà de mobilizacions per carrièras e que dins lo parlament la coalicion serà “implacabla” a l’ora de denonciar lo memorandum del salvament.
 
La nòva esquèrra grèga a aumentat notablament, lo vòte es passat del milion de votants, en mai, a un milion sièis cents mila dimenge passat. La majoritat dels nòus vòtes son arribats del Partit Comunista, que n’a perdut mai de dos cents mila, e del PASOK. Los votants tradicionals del PASOK, sembla que se son repartits entre Nòva Democracia e Syriza. Lo Partit dels Grècs Independents, de drecha e opausat al salvament, es l’autre partit qu’a perdut mai de vòtes, çò’m par en favor de Nòva Democracia. Fin finala, los nazis de Chrysi Avgi (Alba Daurada) an perdut qualques milièrs de vòtes mas consèrvan la lor fòrça malgrat los escandals e las agressions de las darrièras setmanas.
 

Los democratas d’esquèrra s’ofrisson per un tripartit
 
Lo Partit dels Democratas d’Esquèrra s’es ofèrt tanben per far partida d’un govèrn amb Nòva Democracia e PASOK. En aquelas eleccions an perdut dos deputats mas an conservat practicament lo meteis nombre de vòtes e se presentan coma la fòrça que poiriá equilibrar las tensions entre Nòva Democracia e PASOK en un executiu d’unitat nacionala.