Lo pòble atikamekw s’es declarat sobeiran a respècte dels dreches de son país, Nitaskinan, segon çò qu’a publicat Nationalia. Dirigits pel grand cap Constant Awashish, los caps de la nacion atikamekw an demandat al govèrn quebequés de reprene las negociacions.
 
Vòlon pas un estat independent. Vòlon negociar “de nacion a nacion” amb lo govèrn de Quebèc en postulant que tot programa de desvolopament que se faga dins Nitaskinan se deu far per beneficiar al pòble atikamekw e a sa cultura. Aquela declaracion seguís una senténcia recenta de la Cort Suprèma de Canadà a prepaus dels dreches dels pòbles autoctòns, qu’amb ela “es acabat lo temps de la negacion dels dreches non cedits pels atikamekws”, segon Awashish.
 
De son costat, lo primièr ministre de Quebèc, Philippe Couillard, considèra qu’aquela declaracion de sobeiraneitat es puslèu una volontat de “cogestion, de collaboracion, de consultas; çò que volèm far atanben”. Couillard remembrèt qu’en 2013, Quebèc e los atikamekws arribèron a un acòrdi sus la gestion del territòri qu’una de las comunautats refusèt. Mas aquò deu pas empedir que las doas delegacions tornen a la taula de las negociacions e qu’arriben a un acòrdi final, segon Couillard.
 
Nitaskinan es un país d’80 000 quilomètres cairats al nòrd de Montréal. Los atikamekws son una comunautat de 7 000 personas organizadas en tres comunautats: Manawan, Opticiwan e Wemotaci. Parlan una lenga algonquina.