Dijòus que ven se debanarà en Escòcia lo referendum per l’independéncia, que segon los sondatges tant l’òc coma lo non i obtendrián de resultats fòrça sarrats. Pasmens, lo Sunday Telegraph ven de publicar un sondatge ont l’opcion independentista ganhariá per uèch ponches percentuals.
 
En plena campanha, los mèdias escriches an drech de mostrar lor opinion, mas las televisions son obligadas d’èsser imparcialas per aver la licéncia d’emission. Ça que la, las protèstas pel tractament informatiu que la BBC fa del referendum entraïnèron ièr una protèsta multitudinària davant lo sèti central de la BBC a Glasgow. De milièrs d’escoceses manifestèron lor planh contra lo biais unionista que cultiva la cadena publica de television britanica, segon çò que raportèt Vilaweb.
 
Precisament aquel jornal catalan a mandat en Escòcia dos correspondents: raportaràn pendent tota la setmana los eveniments del país celtic que, dijòus, deu votar sus son avenir.